فـــــــــشــــــــة خلـــــــــق

يعني بكرا سوريا كلا رح تقول ياحلب حنّا معاكي للموت؟؟؟ ...
بكرا رح تغص الناس وهية عبتصيح معليش حلب معليش بولادك بتضلّي قلعة ؟؟...
بكرا العالم رح تعدّي ببالا صور ساحات حلب واسواقا؟؟ وشبابا وصباياها؟...
رح تمر عبالن ساحة الحطب والشجرة ومحل الفضة وبياع السمك ولمعة الأرض المغسولة بالحارة الضيقة اللي فيا بيت مليان حكايات وكانت متعتنا نتفرج عليه من برا ونندهش؟..
ويغمضو عيونن ويتذكرو ريحة الغار وصوت كاسة الشاي الي عبتنصب عند عمو ابو عبدو بعد صحن فول معبّي الراس...
وفرحة صبية أو شب "كوول" بأول نزلة على حلب القديمة واحساسو انو يااااااه هلئ حسيت حالي حلبي ؟؟...
رح يتخيلو اقواس الحجر الي بالحارت جوا.. جوا كتير ..
وصوت حركة الناس بالتلل والاحساس وانت مجنكل امك وماشي عبتتذكر وقت كنت صغير شلون كنت تحس النزلة لهون امتع شي بالكون ..
ويطير عقلك على الشغلات الي لساها موجودة متل عمو ابو المعروك عالزاوية وهاكوب وصندويشة السجق !
وتضحك وتوعد حالك انو بكرا ابنك رح تخليه ينزل مع نانا لحالو نفس النزلة !!..
رح يكش بدنن على برودة الحديقة العامة وكاسة "الخميير" الي كان اخوي يحكيلي عنا مع صوت غنية من مسجلة جربانة ويحسو انو "معلّم لسا صوت الضحك" ؟؟ ..
رح ينغم على قلبن وقت يتذكرو رحلة المدرسة الأولى على القلعة والانسة ام وجه مجقور وهية عبتقول" يقرف عمرك يابهيم اش نزلك على حبس الدم !!" .....!!
رح يستوعبو انو زمريا ما كان حجر ومطعم بياكلو فيه الناس الرايقة وبس؟...
وانو عمو ابو عبدو ما اتقدس بس لانو الحلبية بيحبو كرشن ؟ ..
وانو سوق المدينة مو بس شوية تجار ماديين شي طبيعي الله يعاقبن لانو حلب كلّها اغنياء ومو سائلة ؟..
رح يحسّو بانو حلب متلن؟ فيا الغلط وفيا الصح وفيا الظالم وفيا دايما متل كل شي "مظلوم"؟ ...
يمكن رح يحسو ويفهمو ويغصّو وكل شي ...بس نحن الي منعرف انو "الحياة "مكتوبة على تراب حلب من زمان ..
مو بس العز ! واللي ما بيعرف كان شلون يحب حلب من قبل مارح يعرف يحبا هلئ .. وبس "

اي والله ياحيف يسسسسسسسسسسلمو موضوع رائع

كل واحد منكن يحافظ على صور حلب يلي عندو
لأنو على مايبدو مارح نشوف حلب الا بالصور
وآآآآآآآآآآآآآآه عليكي ياحلب

اي والله يا حيف ع حلب !!!!!!

بابي لا تقول هيك بدنا نرجع ونصور صور جديدة